നീലക്കൊടുവേലി

അതേയ് , നീലക്കൊടുവേലി വേണം എന്നുണ്ടോ ? എവിടെ ഇരിക്കുന്നുവോ അവിടം അക്ഷയ ഖനിയാക്കുന്ന അദ്ഭുത സസ്യം? ഉം , .... ഇപ്പൊ നെല്ലും പത്തായത്തില്‍ ഒരു ഇല ഉണ്ടെന്നിരിക്കട്ടെ . നെല്ല് ഒഴിയില്ല , ഇങ്ങനെ നിറഞ്ഞു കവിഞ്ഞു... എടുത്താലും എടുത്താലും തീരാതെ.. പിന്നെ സ്വര്‍ണപ്പണ്ടത്തി ന്‍റെ അറയില്‍ വച്ചാലോ സ്വര്‍ണം ഇങ്ങനെ പൊലിച്ചു വരും. അതാണ് നീലക്കൊടുവേലി . അതിരിക്കണ ഇടത്ത് സര്‍വ ഐശ്വര്യവും എപ്ലും ഉണ്ട

ാവും കേട്ടോ . അപ്പൊ ഈ നീലക്കൊടുവേലി എങ്ങന്യാ കിട്ടുക എന്നാവും അടുത്ത ചോദ്യം . അതിനും ഒരു വഴീണ്ട്‌ . കേള്‍ക്കാന്‍ ഇഷ്ടച്ചാല്‍ പറയാം . എന്തേ ?
നീലക്കൊടുവേലി കിട്ടണം എന്ന് നിരീക്കുന്നോര്‍ ഇതൂടി വായ്ച്ചോളൂ.
കൊടുംകാട്ടിലേക്ക് പോവു . കയ്യില്‍ വഴിയില്‍ കഴിക്കാന്‍ പൊതി ചോറ് വാട്ടിയ വാഴയിലയില്‍ പൊതിഞ്ഞു എടുക്കാന്‍ മറക്കണ്ട . സൂര്യനുദിക്കുമ്പോ പുറപ്പെടുക . ഇനി അങ്ങനെ കാടും മേടും താണ്ടി വനത്തി ന്‍റെ ഉള്ളറകളിലേക്ക് കടന്നു ചെല്ലുക . വനത്തി ന്‍റെ പ്രകൃതി സംഗീതം കേട്ടങ്ങനെ പോവുമ്പോ അങ്ങ് ദൂരെ മലയുടെ ചെരുവില്‍ കൂറ്റന്‍ പ്ലാശു മരം കാണും . തലയില്‍ തീ പിടിച്ച മാതിരി നിക്കണ പ്ലാശു മരം . അതിന്‍റെ ഉച്ചി ക്കൊമ്പത്ത് ഒരു മഹതി കൂട് കൂട്ടീട്ടുണ്ട് . അവളാണ് തിത്തിരി പക്ഷി . നീലക്കൊടുവേലിയുടെ അകം പൊരുള്‍ അറിയുന്നോള്‍ . മരം കേറാന്‍ അറിയിയില്ലലോ എന്ന് ശങ്കിച്ചു സങ്കടം വേണ്ട . പതുക്കെ സമയം എടുത്ത് കേറുക . പ്ലാശു മരമല്ലേ , അതങ്ങനെ നിന്ന് തരും . ഒന്നും പേടിക്കണ്ട . ഇനി ചോറ് ഉണ്ടിട്ടാവാം ബാക്കി . മരച്ചോട്ടില്‍ തണല്‍ പറ്റി ഇരുന്നു പൊതി തുറന്നെ .. ഹായ് എന്തോക്യ ഈ കൊണ്ടാന്നെക്കണേ ? നല്ല കുത്തരിയുടെ തുമ്പപൂ ചോറ് , തേങ്ങ ചുട്ടരച്ച ചമ്മന്തി , .. പിന്നെ കടുമാങ്ങ , പാവയ്ക്കാ കൊണ്ടാട്ടം .. മതി മതി .. ഇത്രയൊക്കെ ധാരാളം . കുക്ഷി നിറഞ്ഞില്ലെ? ഇനി ഒന്ന് മയങ്ങൂ , ഞാന്‍ ബാക്കി പറയാന്‍ ഇപോ വരാട്ടോ .
ഞാനും ഒന്ന് മയങ്ങാന്‍ പോയതാണേ . അപോ ഇനി എഴുന്നേറ്റ് മരം കയറാം .പതുക്കെ പിടിച്ചു പിടിച്ചു ഇലകളുടെ മണം നുകര്‍ന്ന് , മരച്ചില്ലകളുടെ സ്പര്‍ശനം അറിഞ്ഞു , മരത്തിന്‍റെ ഉള്ളകം അറിഞ്ഞങ്ങനെ മുകളില്‍ എത്തിപ്പിടിക്കുമ്പോ ,, അതാ തിത്തിരിപ്പക്ഷി ആകാശ തുഞ്ചത്തെ കൊമ്പത്ത് പൊത്തില്‍ വച്ച കുഞ്ഞുക്കൂട് . അതിനുള്ളില്‍ അമ്മക്കിളിയെ കാത്തു വിശന്നുറങ്ങുന്ന കുഞ്ഞിക്കിളികളെ കാണും . അവരെ ഒന്നും ചെയ്യല്ലെട്ടോ . കുഞ്ഞോമനകള്‍ അല്ലെ ? ആ കൂട് കയ്യില്‍ കരുതിയ ഉരുക്ക് കയര്‍ കൊണ്ട് മുറുക്കി കെട്ടിയിടുക . അത് പറഞ്ഞപ്ല ഓര്‍ത്തെ , ഉരുക്ക് ചങ്ങലെടെ കാര്യം പറയാന്‍ വിട്ടുപോയി . മാപ്പാക്കണേ . മറന്നു പോയീന്നെ . ഇനീപോ എന്താ ചെയ്യാ . ആദ്യം മുതല്‍ കഥ ഉരുക്ക് ചങ്ങലെ കൂടി ചേര്‍ത് അങ്ങോട്ട്‌ വയ്ക്യ . പോരെ . അപോ ചങ്ങല കൊണ്ട് കൂട് ബന്ധിച്ചല്ലോ . തിത്തിരി കുഞ്ഞുങ്ങള്‍ ഉറക്കം എനീട്ടില്ലലോ ? നന്നായി .. ഇനി ഇറങ്ങിപ്പോരെ . ഇതെന്താ എന്ന് സൂക്ഷിച്ചു നോക്കണ്ട . ഇറങ്ങിപ്പോരെ . താഴെ ഒരു രാവ് ഇനി കാത്തിരിപ്പി ന്‍റെ താണ് ...അത് പറയാട്ടോ.
ഇതെന്തായാലും വല്ലാത്ത ഒരു കാത്തിരിപ്പിന്‍റെ രാത്രിയായി പ്പോയി . ആരു എങ്ങനെ എപ്പോള്‍ മനുഷ്യരുടെയാണോ , ദേവന്മാരുടെയാണോ രാത്രി പിന്നിട്ടതെന്നു സംശയം . ഉം , അതെന്തികിലുമാവട്ടെ , രാത്രി കഴിഞ്ഞൂലോ . എന്നാല്‍ രാത്രി എന്താ സംഭവിച്ചത് എന്നറിയണ്ടേ ?
തിത്തിരി പക്ഷി വന്നു നോക്കുമ്പോഴുണ്ട്‌ കുഞ്ഞുങ്ങളെ ആരോ ഉരുക്ക് ചങ്ങലയാല്‍ ബന്ധിച്ചിരിക്കുന്നു . ചുറ്റും പറന്നു നടന്നു തന്‍റെ ചെറിയ മൂര്‍ച്ചയുള്ള കൊക്ക് കൊണ്ട് അമ്മക്കിളി കുറെ ശ്രമിച്ചു ആ ചങ്ങല കൊത്തി വേര്‍പെടുത്താന്‍ . നടന്നില്ല . ഏറ്റവും അവസാനത്തെ പരിഹാരത്തിന് മുന്‍പ് അവനവന്‍ ശ്രമിക്കണമല്ലോ, അതാണ് അമ്മക്കിളി ചെയ്തത് . എന്നിട്ടതു തല കുലുക്കി ഒന്ന് നീട്ടി ചിലച്ചു ദൂരേക്ക്‌ പറന്നു മറഞ്ഞു . രാവിന്‍റെ രണ്ടു യാമം പിന്നിട്ടെ നിലാവ് പരന്നപ്പോള്‍ മടങ്ങിയെത്തി . ചുണ്ടില്‍ ഇരുട്ടില്‍ വിചിത്രമായി അരണ്ട് തെളിഞ്ഞു കണ്ട ഒരു ഇലയുണ്ടായിരുന്നു . വളരെ മനോഹരമായ ആകൃതിയുള്ള തിളങ്ങുന്ന പച്ചില . തിത്തിരി പക്ഷി അത് കൊണ്ട് ഉരുക്ക് ചങ്ങല ഉഴിഞ്ഞു .....
കിളിക്കുഞ്ഞുങ്ങളുടെ ആഹ്ലാദ ക്കലപില കേട്ട് വേഗം ഉണരൂ , കിഴക്ക് ചുവന്നു തുടങ്ങീട്ടില്ല. വേഗം ഉണര്‍ന്നു മുകളിലേക്ക് നോക്കുമ്പോള്‍ കണ്ടില്ലേ, ബന്ധനം അഴിഞ്ഞ കൂടും കിളികളും ?
ഉം, അപ്പൊ അതന്നെ കാര്യം . വേഗം മരച്ചുവട്ടിലുള്ള ഇലകള്‍ എല്ലാം വാരി ഭദ്രമായി എടുക്കു . ഇനി നമുക്ക് താഴ്‌വരയില്‍ കുതിച്ചു പായുന്ന പുഴവക്കത്തേക്കു പോവാം . ഇപോ സൂര്യന്‍ നന്നായുദിച്ചു. ഇന്നത്തെ പ്രഭാതം എന്ത് പ്രകാശം നിറഞ്ഞതാണ്‌ അല്ലെ ? സ്വതന്ത്രരായ കിളികള്‍ എത്ര മനോഹരമായി പാടുന്നു .! പുഴവക്കില്‍ എത്തിയല്ലോ . ഇനി കയ്യിലെ പൊതിയില്‍ ഉള്ള ഇലകള്‍ അത്രയും ഒഴുക്കി വിടു. ഹേ , അതാ നോക്കൂ ഒരില , അതെ ഒരില മാത്രം അതാ ഒഴുക്കിനെതിരെ ഒരു മത്സ്യം പോലെ നീന്തിപ്പോകുന്നു . വേഗം കയ്യെത്തി എടുക്കു . കിട്ടീലെ എത്രയും അമൂല്യമായ നീലക്കൊടുവേലി !!!!
അതാണ് നീലക്കൊടുവേലി . ഒഴുക്കിനെതിരെ നീന്തുന്ന , ഏതു ബന്ധനങ്ങളും തകര്‍ക്കുന്ന. അക്ഷയ ഖനിയായ നീലക്കൊടുവേലി ...
ഒന്നറിഞ്ഞോ നിങ്ങള്‍ ? ഈ നീലക്കൊടുവേലി നിങ്ങളുടെ ഉള്ളിലെ പ്പോഴും ഉണ്ടായിരുന്നത് തന്നെയാണ് . പക്ഷെ ഹൃദയത്തിനൊപ്പം അതീവ ജാഗ്രതയുള്ള ഒരു അന്വേഷണം വേണം കണ്ടു പിടിക്കാന്‍ എന്ന് മാത്രം ..
ഇഷ്ടായില്ലേ കഥ ??? ഉം ???

-----------
വി. മീനാക്ഷി