സ്വപ്നാടകയുടെ പാട്ട്

പാട്ടു തുടങ്ങുകയാണ് .

സ്വപ്നാടനവും .

വരികള്‍ പിന്നിട്ടു

പടവുകള്‍ താണ്ടി

മലകള്‍ കയറി

താഴ്‌വാരം ചുറ്റി

ചുരങ്ങളിറങ്ങി

പാട്ടു പോകുന്നു .

താളത്തിന് പിറകില്‍

താളമായി പെയ്യുന്ന ഹൃദയ താളം.

ഈ ഗാനം നിര്‍ത്താനാവില്ല ,

ഈ സ്വപ്നാടനവും .

കവിളില്‍ ചോര കിനിയുന്നു .

ശിരസ്സിനുള്ളില്‍ നിന്നും ഒരു

നീല നദി ഇരുമിഴികളില്‍

ഈണമായി പെയ്യുന്നു .

വിരല്‍തുമ്പുകള്‍ പൊള്ളിക്കുന്ന

അഗ്നിതന്ത്രികള്‍ മീട്ടാതെ വയ്യ

തളരുന്ന നാവില്‍ മൃദുസ്വരങ്ങള്‍

നിലക്കുവതെയില്ല

സ്വപ്നാടനത്തില്‍ ഒന്നും നിലക്കുവതില്ല .

ഉണര്‍ച്ചയില്‍ നിന്നും നിദ്രയിലേക്ക്

നിദ്രയില്‍ നിന്നും ഉണര്ച്ചയിലേക്ക്

നിര്‍ത്താതെയോഴുകുമീ സംഗീത സ്വപ്നാടനം .

------

വി . മീനാക്ഷി .